एजेन्सी – कप्तान सूर्यकुमार यादवको विश्व कीर्तिमानी शतक र स्पिनर कुलदीप यादवको घातक बलिङको सहयोगमा भारतले तेस्रो तथा अन्तिम टि२० आई खेलमा दक्षिण अफ्रिकामाथि १ सय ६ रनको सानदार जित हात पारेको छ । योसँगै तीन खेलको सिरिज १–१ को बराबरीमा सकिएको छ ।

जितको लागि २ सय २ रनको विशाल विजयी लक्ष्य पछ्याएको दक्षिण अफ्रिका १३.५ ओभरमा ९५ रनमा अल आउट भयो । दक्षिण अफ्रिकाका डेविड मिलरले २५ बलमा २ चौका र २ छक्कासहित सर्वाधिक ३५ रन बनाए । एडेन माक्ररम १४ बलमा ३ चौका र २ छक्कासहित २५ रन बनाए । अन्य कुनैपनि ब्याटरले राम्रो प्रदर्शन गर्न सकेनन् ।

भारतका कुलदीप यादवले २.५ ओभरमा १७ रन खर्चेर ५ विकेट लिए । रविन्द्र जडेजाले दुई, मुकेश कुमार र अर्शदीप सिंहले एक एक विकेट लिए ।

त्यसअघि टस हारेर पहिला ब्याटिङको निम्तो पाएको भारतले निर्धारित २० ओभरमा ७ विकेट गुमाउँदै २ सय १ रन बनायो । भारतका सूर्यकुमार यादवले ५६ बलमा ७ चौका र ८ छक्कासहित १ सय रनमा अविजित रहे । सूर्यको यो टि२० आई क्रिकेटमा चौथो शतक हो । उनले टि२० आईमा सर्वाधिक शतकको कीर्तिमान रोहित शर्मा र ग्लेन म्याक्सवेलसँग बराबर गरेका छन् ।

यशस्वी जैसवाल ४१ बलमा ६ चौका र ३ छक्कासहित ६० र रिंकु सिंह १४ रनमा आउट भए । अन्यले भने राम्रो प्रदर्शन गर्न सकेनन् । दक्षिण अफ्रिकाका केशव महाराज र लिजार्ड विलियम्सले समान दुई विकेट लिए ।

पहिलो खेल वर्षाको कारण रद्ध भएको थियो । दोस्रो खेलमा दक्षिण अफ्रिका ५ विकेटले विजयी भएको थियो । अव यी दुई देशबीच तीन ओडिआई र दुई टेस्ट खेलको सिरिज हुनेछ । पहिलो ओडिआई आइतबार हुनेछ ।