Pura Samachar
  • के पुनः लकडाउन हुँदैछ ?

    प्रकाशित: २ महिना पहिले

    के पुनः लकडाउन हुँदैछ ?

    काठमाडौं । लकडाउन पूर्णरुपमा अन्त्य भएपछिका १५ दिनमा कोरोनाको संक्रमण बढ्दै गएपछि के अब सरकारले पुनः त्यस्तै नयाँ कदम चाल्दैछ ? आम नागरिकमा जिज्ञासा र चासो रहँदै आएको छ । कोरोनाको मात्रा बढ्दै जानुले खतरा घटेको होइन बढेको देखाइरहेको छ ।

    बिहीबारमात्रै देशभर तीन सय ६० जनामा कोरोना संक्रमण भएको तथ्य सार्वजनिक भएको छ । कूल छ हजार ५ सय २२ जनाको कोरोना परीक्षण गर्दा तीन सय ६० जना संक्रमित भेटिएको स्वास्थ्य तथा जनसंख्या मन्त्रालयले जानकारी दिएको छ । देशभर कूल संक्रमित संख्या २१ हजार सात सय ५० पुगेको छ । बिहीबारमात्रै काठमाडौंमा थप ७६ जना नयाँ संक्रमित भेटिएका छन् ।

    जोखिम बढिरहेका बेला मन्त्रिपरिषद्को निर्णयका बारेमा जानकारी दिन आयोजित पत्रकार सम्मेलनमा सरकारका प्रवक्तासमेत रहेका अर्थ, सञ्चार तथा सूचना प्रविधिमन्त्री डा युवराज खतिवडालाई सञ्चारकर्मीले सोधे ‘के सरकारले पुनःलकडाउन गर्दैछ वा तयारी के छ ?’

    सञ्चारकर्मीको जिज्ञासामा मन्त्री खतिवडाले भने, ‘तत्काललाई विगतको जस्तो देशव्यापी लकडाउन हुँदैन । सरकारले त्यसबारेमा केही सोचेको छैन, तर अवस्था हेरेर आवश्यक निर्णय हुन्छ ।’ कोरोना भाइरसको जोखिम हेरेर जिल्ला प्रशासन कार्यालय र स्थानीय सरकारले आवश्यक निर्णय गर्नसक्ने उनको भनाइ छ । स्थानीय प्रशासनले केही जिल्लामा पूर्ण लकडाउनसमेत गरेको मन्त्री खतिवडाले जानकारी दिए ।

    मन्त्री खतिवडाले संक्रमणको जोखिम कम भएको स्थानमा अवस्था हेरेर खुकुलो बनाइएको र संक्रमण बढी भएको स्थानमा थप कडाइ गरिने बताए । उनले अर्थतन्त्रमा परेको प्रभावको पनि विश्लेषण भइरहेको र आवश्यकताका आधारमा सरकारले निर्णय गर्ने उल्लेख गरे ।

    सरकारले आगामी भदौ १ गतेदेखि शैक्षिक संस्था, आन्तरिक तथा बाह्य हवाई उडान तथा लामो दूरीको सवारीसाधन सञ्चालन गर्ने यसअघि नै घोषणा गरेको थियो । संक्रमणको मात्रा बढ्दै जाँदा अब ती क्षेत्रका बारेमा सरकारले के निर्णय गर्ला भन्ने सञ्चारकर्मीको जिज्ञासामा मन्त्री खतिवडाले भने, “अहिलेको अवस्थामा ती क्षेत्र खुला गर्ने अवस्था नआएको र पुनःविचार हुनसक्छ । जोखिम बढेकाले तत्काल नखोलौं भन्ने आवाज पनि आइरहेको छ ।”

    मन्त्री खतिवडाले सीसीएमसीको बैठकमा आवश्यक समीक्षासहित मन्त्रिपरिषद्ले निर्णय गर्ने जानकारी दिए । उनले प्रधानमन्त्रीले आयोजना गरेको विज्ञसहितको बैठकमा पनि विभिन्न उपाय आएको भन्दै आवश्यकताका आधारमा मात्रै सरकारले निर्णय गर्ने उल्लेख गरे । उनले केही न्यूनतम कुरा नगरे एकदमै समस्या हुने र आर्थिकरुपमा श्वास फेर्न पनि कठिन हुन्छ भन्ने खालका कुरासमेत आइरहेको बताए ।

    मन्त्री खतिवडाले विदेशबाट आउन चाहने नेपाली नागरिकको हकमा समेत आवश्यक निर्णय हुने जानकारी दिए । उनले भने, “उद्धार गर्नै पर्नेलाई ल्याउनु नै पर्छ, तर केही समय त्यहाँ बस्दा सुरक्षित हुनेलाई अवस्था केही सहज भएपछि ल्याउने पक्षमा छौं ।”

    सुरुमा पाँच हजार जनाको तथ्यांक आए पनि हालसम्म ४५ हजार बढी नेपाली नागरिकको उद्धार भइसकेको र अझै दूतावासमा फर्कन चाहेनको संख्या ४५ हजार बढी रहेको तथ्यांक आइसकेको उनको भनाइ छ । प्राप्त विवरणअनुसार कतिपय आफ्नो प्रवेशाज्ञाको म्याद सकिएका कारण फर्कन चाहेका छन् भने कतिपय स्वभाविकरुपमा फर्कन चाहेका छन् ।

    प्रतिक्रिया