राष्ट्रिय सभा सदस्यका लागि आज भएको निर्वाचनमा अधिकांश स्थानमा गठबन्धनका उम्मेद्वार विजयी भएका छन् । सरकारमा सामेल पाँच दलीय गठबन्धनका उम्मेद्वारहरु प्रमुख प्रतिपक्ष एमालेका उम्मेद्वारलाई पराजित गर्दै विजयी भएका हुन् । प्रदेश १ बाट राष्ट्रियसभाको अन्यतर्फको सदस्यमा नेपाली कांग्रेसका गोपाल बस्नेत निर्वाचित भएका छन् ।नेकपा एमालेका उम्मेदवार गुरु बराल र बस्नेतले बराबर मत ल्याएपछि गोला प्रथाबाट विजेताको टुंगो लगाइएको हो । एमाले उम्मेदवार बराल र नेपाली कांग्रेसका उम्मेदवार बस्नेतले बराबर ४ हजार ४ सय ८८ मत प्राप्त गरेका थिए । तर गोला प्रथा गर्दा बस्नेत निर्वाचित भएका हुन् ।तर यहाँ एमालेका उम्मेदवार सोनाम गेल्जेन शेर्पा निर्वाचित भएका छन् । गठबन्धनका उम्मेदवार जनता समाजवादी पार्टीका हेमराज राईलाई अल्पसंख्यक कोटाबाट पराजित गर्दै शेर्पा निर्वाचित भएका हुन् । हालसम्मको परिणाम अनुसार शेर्पा नै एमालेका एक्ला विजेता हुन् ।

यस्तै प्रदेश १ को महिलातर्फ जयन्ती राई निर्वाचित भएकी छन् । सत्ता गठबन्धनको तर्फबाट उम्मेदवार बनेकी एकीकृत समाजवादी पार्टीकी नेतृ राईएमालेकी सावित्रा भण्डारीलाई पराजित गर्दै विजयी भएकी हुन् । मधेश प्रदेशको निर्वाचनमा नेकपा माओवादी केन्द्रकी उर्मिला अर्याल निर्वाचित भएकी छन् । एमाले र लोसपाको गठबन्धनका उम्मेद्वारलाई पराजित गर्दै अर्याल निर्वाचित भएकी हुन् ।यस्तै वाग्मती प्रदेशतर्फको दुवै सिटमा सत्तारुढ गठबन्धन विजयी भएको छ । महिला र अन्यतर्फका गरी दुई सदस्य चयनका लागि भएको निर्वाचनमानेकपा एकीकृत समाजवादीकीगोमादेवी तिमल्सिना र काँग्रेसका कृष्णप्रसाद पौडेल विजयी भएका हुन् । उनीहरुले एमालेका निरुकुमारी कुँवर र गोपाल शाक्यलाई पराजित गरेका हुन् । यहाँ नेमकिपाबाट महिलातर्फगीता काफ्ले समेत उम्मेदवार बनेकी थिइन ।

यस्तै गण्डकी प्रदेशमा भएको निर्वाचनमा समेत गठबन्धनकै उम्मेद्वार निर्वाचित भएका छन् । राष्ट्रिय सभा सदस्यको तीन सीटका लागि भएको निर्वाचनमा महिला कोटामा कांग्रेसकी कमला पन्त, अन्य र दलित कोटाबाट माओवादी केन्द्रका सुरेश आलेमगर र भुवनबहादुर सुनार निर्वाचित भएका छन् । उनीहरुले एमालेका लीला पोखरेल थनेत, अर्जुनकुमार सुनाम र पुण्यप्रसाद पौडेललाई पराजित गरेका हुन् ।

लुम्बिनी प्रदेशको निर्वाचनमा समेत गठबन्धनकै उम्मेद्वार निर्वाचित भएका छन् । गठबन्धनको तर्फबाट नेपाली कांग्रेसका नेता युवराज शर्मा, नेकपा एकीकृत समाजवादीबाट महिलातर्फ राजेन्द्रलक्ष्मी गैरे र जनमोर्चाको तर्फबाट दलित उम्मेदवार तुलप्रसाद विश्वकर्मा निर्वाचित भएका हुन् । उनीहरुले एमालेका रामदयाल गुप्ता, भारती उपाध्याय खनाल र कृष्ण सुनारलाई पराजित गरेका हुन् ।कर्णालीको राष्ट्रिय सभा सदस्य निर्वाचनमा समेत गठबन्धनकै उम्मेद्वार निर्वाचित भएका छन् ।तीन सिटका लागि भएको निर्वाचनमा कांग्रेसकी दुर्गाकुमारी गुरुङ, नेकपा माओवादी केन्द्रका नरबहादुर विष्ट र नेकपा एकिकृत समाजवादीका उदय बोहरा विजयी भएका हुन् । उनीहरुले एमालेका गंगा थापा महत, पदमबहादुर माझी र चूडामणि शर्मालाई पराजित गरेका हुन् ।

यस्तै सुदुरपश्चिम प्रदेशका तीनै सिटमा गठबन्धनका उम्मेद्वार निर्वाचित छन् ।राष्ट्रियसभा सदस्य खुलातर्फ नेपाली काँग्रेसका नारायणदत्त मिश्र, दलिततर्फ माओवादी केन्द्रका जगत पार्की र महिलातर्फ एकीकृत समाजवादी पार्टीकी मदनकुमारी शाह विजयी भएका हुन् । उनीहरुले एमालेका डिल्लीराज भट्ट, नरेश विक र सन्तोषकुमार थापा शर्मालाई पराजित गरेका हुन् ।

१९ सिटका लागि भएको निर्वाचनका गठबन्धनका १६ र एमाले एकजना निर्वाचित भएका छन् भने मधेश प्रदेशमा दुई सिटको नजिता आउन बाँकी छ ।