इन्ज्युरी समयमा सुमन अर्यालले गोल गरेपछि शीर्ष चारको दौडमा रहेको विभागीय त्रिभुवन आर्मी फुटबल क्लबले कतार एअरवेज सहिद स्मारक ‘ए’ डिभिजन लिगमा जावलाखेल युथ क्लबसँगको हारबाट जोगिएको छ । आर्मीले जावलाखेल युथ क्लबसँग १–१ गोलको बराबरी खेलेको हो ।

त्रिपुरेश्वरस्थित दशरथ रंगशालामा शुक्रबार भएको खेलको अन्तिम समयमा सम्हालिन नसक्दा जावलाखेलले अंक बाड्न बाध्य बन्यो । जावलाखेलका ओनगुना निकेंगे जुनियरले एक गोल गरे ।

त्यसअघि खेलको दोस्रो मिनेटमा सन्तोष तामाङको कर्नरमा डिफेन्डर र गोलरक्षकबीच तालमेल नमिल्दा आएको बलमा जर्जप्रिन्स कार्कीको प्रहार सिमन्त थापालाई लाग्दै फर्कदा गोलरक्षक टिकेन्द्र सिंह थापाले नियन्त्रणमा लिन सफल भए । २४औं मिनेटमा ओनगुना निकेंगे जुनियरकले एकल प्रयासमा गरेको प्रहारलाई गोलरक्षक विकेश कुथुले दोस्रोबारतर्फ डाइभ दिदै पञ्च गर्दा जावलाखेल अग्रता लिनबाट चुक्यो ।

२९औं मिनेटमा सुमन अर्याल र विकास तामाङबीच समन्वय नमिल्दा ओनगुनाले बल भेट्दै गरेको प्रहारलाई विकेशले नै उत्कृष्ट बचाउ गरे । त्यसमै निकोलस फर्नान्डेसको कर्नरमा सिमन्त थापाको हेड सदुपयोग हुन सकेन । ३१औं मिनेटमा कप्तान भत खवासको प्रहारलाई गोलरक्षक टिकेन्द्रले सहजै नियन्त्रणमा लिए ।

५३औं मिनेटमा अ‍ोनगुना जुनियरले गोल गर्दै जावलाखेललाई १–० को अग्रता दिलाए । रुप बहादुर लामाको ब्याकहिल पासलाई नियन्त्रणमा लिदै तीन डिफेन्डरबीचबाट ओनगुनाले गरेको प्रहार पोलमा लाग्दै गोलमा परिणत भएको थियो ।

गोलरक्षक टिकेन्द्रले गल्ती गर्दा इन्ज्युरी समयको थप गरिएको पहिलो मिनेटमा सन्तोष तामाङको फ्रिकिकलाई गोलरक्षक टिकेन्द्रले पञ्च गर्दै बचाउँदा आर्मी बराबरीबाट चुक्यो । रिवाउन्डमा राजीव गुरुङको प्रहार आकासियो । इन्ज्युरी समयमको थप गरिएको छैटौ मिनेटमा सुमन अर्यालले गोल गर्दै आर्मीलाई हारबाट जोगाए । जगजित श्रेष्ठको क्रसमा राजीव गुरुङले प्रयास गरेपनि अनमार्क रहेका सुमनले फाइनल टच दिएका थिए ।

यो बराबरीसँगै अपराजित रहेको आर्मी १० खेलबाट १८ अंक जोडेर तेस्रो स्थानमा यथावत रहेको छ । आर्मीले चार जित र ६ बराबरीको नतिजा निकालेको छ । यो बराबरीले जावलाखेल १० खेलबाट ९ अंक जोडेर ११औं स्थानमा रहेको छ ।