थापा धनकुटाका नेता लाक्पा तामाङको अध्यक्षतामा गठन भएको राप्रपा नेपालको अध्यक्ष भएका हुन्।
आइतबार लामाले अध्यक्ष पदबाट राजीनामा दिएपछि थापा राप्रपा नेपालको अध्यक्ष भएका हुन्।
‘उहाँको नेतृत्वमा अहिले ६१ सदस्यीय केन्द्रीय समिति गठन भएको छ,’ लामाले भने, ‘उहाँको नेतृत्वमा नयाँ कार्यसमितिबारे निर्वाचन आयोगलाई लेखेर पठाउने निर्णय भएको हो।’
तीन वटा राप्रपा एक भएपछि राप्रपा नेपाल नामको पार्टी लामाले आयोगमा दर्ता गराएका थिए।
यो पार्टीको विधान अनुसार १५१ जनाको केन्द्रीय समिति बन्नुपर्ने प्रावधान छ। अहिलेका लागि ६१ सदस्यीय समिति बनेको लामाले बताए।
राजेन्द्र लिङ्देनसँग पराजित भएपछि थापाले पूर्वराजा र निर्मल निवासले हराएको भन्दै पार्टीमा छानबिन गर्न माग गरेका थिए।
केही दिनअघि थापाले हेटौंडा पुगेर पार्टी परित्याग गरेको घोषणा गरेका थिए।
‘अत्यन्त भारी मन तथा पीडाबोधका साथ मैले राष्ट्रिय प्रजातन्त्र पार्टीबाट अलग हुने निर्णय गरेको छु। पार्टीभित्र देखा पर्न थालेको सैद्धान्तिक विचलन तथा गलत प्रवृत्तिलाई सुधार गरेर मेरो बाँकी क्रियाशील राजनीतिक जीवन पार्टी भित्रै बिताउने र पार्टी मै रमाउने उत्कट चाहना भएता पनि आफ्नो कुराको सुनुवाइ नहुने भएपछि मैले यो अप्रिय निर्णय लिन बाध्य भएको हुँ,’ थापाले भनेका छन्, ‘राप्रपामा रहँदा पार्टीका साथी सहयोगी र शुभचिन्तकबाट प्राप्त सहयोग, सद्भाव र स्नेह प्रति म सदैव आभारी रहने छु। पार्टीमा रहँदा बिताएका क्षणहरूप्रति म सदैव गौरव गरिरहने छु। राप्रपाका कुनै साथीहरूसँग मेरो वैरभाव छैन सबैको भलो होस् भन्ने कामना गर्दछु।’
थापाले त्यसपछि राष्ट्रिय एकता पार्टी गठन गर्न खोजेका थिए।
२०६३ सालदेखि थापा त्यही राप्रपा नेपालको अध्यक्ष थिए। राप्रपा एकता भएपछि उक्त पार्टीको नेतृत्व लामाले गरिरहेका थिए।
प्रतिक्रिया