काठमाडौंको नागार्जुन नगरपालिका-६ स्थित रामकोट डाँडापौवाको एक घरमा एक जना व्यक्ति मृत फेला चार जना गम्भीर अवस्थामा

काठमाडौंको नागार्जुन नगरपालिका-६ स्थित रामकोट डाँडापौवाको एक घरमा एक जना व्यक्ति मृत फेला परेका छन्।

त्यो घरका अन्य चार जना गम्भीर अवस्थामा फेला परेका छन्। प्रहरीका अनुसार सोमबार राति घरमा रहेका पाँचमध्ये एक जना मृत अवस्थामा फेला परेका हुन्।

महानगरीय प्रहरी कार्यालय रानीपोखरीका अनुसार गम्भीर रहेका चार जनाको मनमोहन मेमोरियल अस्पतालमा उपचार भइरहेको छ।

मृत्यु हुनेमा २८ वर्षीय सुवर्णमान प्रधान छन्। यसैगरी, गम्भीर हुनेमा ३३ वर्षीया मन्दिरा प्रधान, ३८ वर्षीय भीममान प्रधान, ६३ वर्षीया इन्द्रमाया प्रधान र ११ वर्षीया सुब्रिना प्रधान छन्।

‘एकैघरका पाँचमध्ये एकको मृत्यु भएको र अन्य चार जनालाई उपचारका लागि मनमोहन अस्पताल लगिएको विवरण आएको छ,’ महानगरीय प्रहरी कार्यालय रानीपोखरीका प्रमुख प्रहरी अतिरिक्त महानिरीक्षक हरिबहादुर पालले भने।

प्रारम्भिक अनुसन्धानमा त्यो परिवारका व्यक्तिले सामूहिक आत्महत्या गर्ने मनसायले विष सेवन गरेको देखिएको पालले जानकारी दिए।