काठमाडौं । क्रिस्टियानो रोनाल्डोले ह्याट्रिक गरेपछि इंग्लिस प्रिमियर लिग फुटबलमा म्यानचेस्टर युनाईटेडले जित निकालेको छ ।
शनिबार राति भएको खेलमा युनाईटेडले टोटेनहमलाई ३-२ गोल अन्तरले हराएको हो ।
घरेलु मैदानमा खेलको १२ औं मिनेटमा रोनाल्डोले गोल गर्दै युनाईटेडलाई सुरुआती अग्रता दिलाए ।
खेलको ३५ औं मिनेटमा ह्यारी केनले पेनाल्टीमा गोल गर्दै टोटेनहमलाई १-१ गोलको बराबरीमा ल्याए ।
खेलको ३८ औं मिनेटमा रोनाल्डोले व्यक्तिगत दोस्रो गोल गर्दै टोलीलाई २-१ को अग्रता दिलाए ।
खेलको ७२ औं मिनेटमा युनाईटेडका ह्यारी मग्वाएरले आत्मघाती गोल गरेपछि खेल २-२ को बराबरीमा पुग्यो ।
त्यसपछि खेलको ८१ औं मिनेटमा रोनाल्डोले ह्याट्रिक पूरा गर्दै युनाईटेडलाई ३-२ गोलको जित दिलाए ।
यस ह्याट्रिकसँगै रोनाल्डोले व्यवसायिक फुटबलमा सर्वाधिक गोलकर्ताको कीर्तिमान बनाएका छन् ।
उनले ८ सय ७ गोल पूरा गर्दै कीर्तिमान बनाएका हुन् ।
युनाईटेड फर्किएपछि रोनाल्डोको यो पहिलो ह्याट्रिक हो । उनले १४ वर्ष ५९ दिनपछि प्रिमियर लिगमा ह्याट्रिक गरे ।
जितसँगै युनाईटेडले २९ खेलमा ५० अंक जोडेको छ ।
युनाईटेड चौंथो स्थानमा रहेको छ ।
टोटेनहम ४५ अंक जोडेर सातौं स्थानमा रहेको छ ।
प्रतिक्रिया