काठमाडौं । सहिद स्मारक ‘ए’ डिभिजन लिग फुटबलमा जवालाखेल युथ क्लब र एफसी खुमलटारले बराबरी खेल्दै अंक बाडेका छन्।
एन्फा कम्प्लेक्समा शुक्रबार जावलाखेल र खुमलटारले २-२ गोलको रोमान्चक बराबरी खेलेका छन् ।
खेलको ३२ औं मिनेटमा एनकोटो मोसाबीले गोल गर्दै जावलाखेललाई सुरुआती अग्रता दिलाएका थिए ।
तर, ३५ औं मिनेटमा अविशेक लिम्बुले गोल गर्दै खुमलटारलाई १-१ गोलको बराबरीमा ल्याए ।
खेलको ६३ औं मिनेटमा मेसुके ओलुमोउले गोल गर्दा खुमलटार २-१ ले अघि रह्यो ।
त्यसपछि खेलको ८६ औं मिनेटमा फोडे फोफानाले गोल गर्दै जावलाखेललाई २-२ गोलको बराबरीमा ल्याए ।
यस बराबरीसँगै जावलाखेलले ७ खेलमा १४ अंक जोडेको छ । जावलाखेल दोस्रो स्थानमा रहेको छ ।
खुमलटार ७ खेलमा ७ अंक जोडेर नवौं स्थानमा रहेको छ ।
सहिद स्मारक ‘ए’ डिभिजन लिग फुटबलमा मनाङ मर्स्याङदी क्लबले सहज जित निकालेको छ ।
च्यासल मैदानमा शुक्रबार मनाङले फ्रेन्ड्स क्लबलाई २-० गोल अन्तरले हराएको हो ।
मनाङको जितमा कोफी टिमोथी कुदोले दुई गोल गरे ।
खेलको ३४ औं मिनेटमा कोफीले गोल गर्दै मनाङलाई सुरुआती अग्रता दिलाएका थिए ।
त्यसपछि खेलको ५२ औं मिनेटमा कोफीले व्यक्तिगत दोस्रो गोल गर्दै मनाङलाई २-० को जित दिलाए ।
जितसँगै मनाङ अंक तालिकाको शीर्ष स्थानमा उक्लिएको छ ।
अपराजित मनाङको यो चौंथो जित हो । मनाङले ६ खेलमा १४ अंक जोडेको छ ।
फ्रेन्ड्स ४ अंक जोडेर १२ औं स्थानमा रहेको छ ।
प्रतिक्रिया