काठमाडौं । प्रतिनिधिसभाकाे बैठक आज बस्दैछ । संघीय संसद सचिवालयका अनुसार बैठक अपरान्ह १ बजे बस्ने लागेकाे हाे ।

नेकपा एमालेले एक क्विन्टल सुन प्रकरणलाई लिएर आज पनि संसद् बैठक चल्न नदिने चेतावनी दिएको छ ।

प्रधानमन्त्री पुष्पकमल दाहाल र एमाले अध्यक्ष केपी शर्मा ओलीबीच आइतबार भएको भेटमा संसद्को अवरोध हटाउनेबारे कुनै निष्कर्षमा नपुगेको एमाले उपाध्यक्ष सुवासचन्द्र नेम्वाङले जानकारी दिनुभएकाे छ ।

‘कुनै निष्कर्ष प्रधानमन्त्रीले अध्यक्षलाई दिनु भएन भन्ने जानकारी छ,’ नेम्वाङले भन्नुभयाे, ‘संसद्को अवरोध यथावत् नै रहन्छ ।’त्रिभुवन विमानस्थलबाट नियन्त्रणमा लिइएको करिब सय किलो सुनको मालिक पक्राउ गर्न नसकेको भन्दै एमालेले साउन १० गते बसेको प्रतिनिधिसभा बैठक अवरुद्ध गरेको थियो ।