Pura Samachar
  • रूस र उत्तर कोरियाका ह्याकरको निशानामा कोरोनाको खोप उत्पादक कम्पनी

    प्रकाशित: २ हप्ता पहिले

    रूस र उत्तर कोरियाका ह्याकरको निशानामा कोरोनाको खोप उत्पादक कम्पनी

    काठमाडौँ- कोरोना भाइरसविरूद्धको खोप बनाइरहेका कम्पनीहरू रुस र उत्तर कोरियाली ह्याकरको निशानामा परेको प्रविधि कम्पनी माइक्रोसफ्टले दाबी गरेको छ ।

    ‘फ्यान्सी बियर’ रुसी समूह तथा उत्तर कोरियाली ‘जिन्क’ र ‘सेरियम’ समूहहरू पछिल्ला साइबर हमलामा संलग्न पाइएको माइक्रोसफ्टको दाबी छ ।

    यूकेको राष्ट्रिय साइबर सुरक्षा केन्द्र एनसीएससीले यसअघि नै रुसी ह्याकरहरूले खोपको अनुसन्धानलाई निशानामा पारेको जनाएको थियो।

    ह्याकरहरूले अक्सफर्ड विश्वविद्यालय र अन्य संस्थाका अध्ययन चोर्ने प्रयास गरेको बताइएकोमा  रुसले त्यसको खण्डन गरेको थियो ।

    माइक्रोसफ्टका अनुसार थुप्रै औषधि उत्पादक कम्पनीको कम्प्युटर प्रणाली तोड्न प्रयासहरू भएका छन्।

    निशानामा पारिएका खोपका अनुसन्धानहरू क्यानडा, फ्रान्स, भारत, दक्षिण कोरिया र अमेरिकाको रहेको बीबीसीले जनाएको छ ।

    ‘रुसी समूहले दशौँ लाख पासवर्ड प्रयोग गरेर प्रणालीमा प्रवेश गर्ने ‘ब्रुट फोर्स’ उपाय अपनाएको छ,’ माइक्रोसफ्टले भनेको छ ।

    एउटा उत्तर कोरियाली समूहले त विश्व स्वास्थ्य सङ्गठन डब्ल्यूएचओको प्रतिनिधि भन्दै इमेल पठाएर पासवर्ड फुत्काउने प्रयास गरेको बताइएको छ।

    यसबारे राष्ट्रसङ्घमा रहेका उत्तर कोरियाली प्रतिनिधिले अहिलेसम्म कुनै जवाफ दिएका छैनन्। तर, वाशिङ्टनस्थित रुसी दूतावासले भने त्यस्तो दाबीको अझै पनि खण्डन गरेको छ ।

    प्रतिक्रिया