नवलपुर । विभागीय डर्बीमा एपीएफलाई हराउँदै पुलिस क्लब राईनो संरक्षण गोल्डकप फुटबलको सेमिफाइनलमा प्रवेश गरेको छ ।
बिहीबार भएको क्वार्टरफाइनलको खेलमा एपीएफलाई २–० ले हराउँदै पुलिस अन्तिम ४ मा प्रवेश गरेको हो ।
तनावपूवर्ण खेलमा दुवै टिमले १० खेलाडीमा रहेर खेलको अन्त्य गरेका थिए । खेलमा अग्रता पुलिसले सातौं मिनेटमा प्रताप गुरुङको गोलबाट लिएको थियो ।
खेलको ५९ औं मिनेटमा एपीएफका शरन बस्नेतले रातो कार्ड खादै मैदान बाहिरिएपछि टोली १० खेलाडीमा सिमित बनेको थियो ।
नेपाल पुलिसका उज्जवल राईले ७१ औं मिनेटमा रातो कार्ड खादै मैदान बाहिरिएका थिए । खेलका इन्जुरी समयमा सन्जिब लामाले गोल गर्दै पुलिसको जित सुनिश्चित गरे ।
पुलिसका शत्रुघन चौधरी खेलको म्यान अफ दी म्याच घोषित भए ।
शुक्रबार प्रतियोगिताको तेस्रो क्वार्टरफाइनल खेलमा मछिन्द्र र गण्डकी प्रदेशबीच खेल हुनेछ ।
राईनो क्लब मध्यबिन्दु नवलपुरको आयोजनामा सञ्चालित प्रतियोगितामा १२ टिम सहभागी छन् । प्रतियोगिताको विजेताले उपाधिसहित नगद ८ लाख हात पार्नेछ भने उपविजेताले ४ लाख प्राप्त गर्नेछ ।
प्रतियोगिताको सर्वोत्कृष्ट खेलाडीले २० हजार रुपैयाँ प्राप्त गर्ने तथा सर्वाधिक गोलकर्ताले १० हजार र म्यान अफ द म्याच हरेक खेलमा ५ हजार रुपैयाँ प्राप्त गर्नेछन् ।
प्रतिक्रिया