काठमाडौं। साउदी अरबमा जारी वाफ वुमेन्स च्याम्पियनसिपको उपाधिका लागि आज नेपाल र जोर्डनबीच प्रतिस्पर्धा हुँदैछ । आजको खेल नेपाली समय अनुसार राति ९ : ४५ बजे प्रिन्स अबदुल्लाह अल फैजल स्टेडियममा हुनेछ ।

पहिलोपटक वाफ वुमेन्स च्याम्पियनसिप खेलिरहेको नेपाल जारी प्रतियोगितामा उत्कृष्ट प्रदर्शन गर्दै आएको छ । जोर्डन भने पाँच पटकको विजेता हाे ।

समूह ‘बी’ को विजेता बन्दै सेमिफाइनल पुगेको नेपालले समूह ‘ए’ को उपविजेता लेबनानलाई इन्जुरी समयमा २–१ ले पराजित गर्दै फाइनल पुगेको हो भने जोर्डनले प्यालेस्टाइनलाई ५–० ले पराजित गर्दै फाइनलमा स्थान सुरक्षित गरेको हो।

आजको खेलमा नेपालकी फरवार्ड सावित्रा भण्डारी सहभागी नहुने भएकी छिन् । उनले जारी प्रतियोगितामा नौ गोल गरेकी थिइन् । आज नेपाली टोलीका प्रिति राई, समीक्षा घिमिरे, अमृता जैशी लगायतका खेलाडीको प्रदर्शनलाई महत्वका साथ हेरिएको छ ।