काठमाडौं । हङकङमा आजबाट सुरु त्रिदेशीय टी-ट्वान्टी आईको पहिलो खेलमा घरेलु टोली र नेपालबीचको खेल रद्द भएकोे छ ।

खेल रद्द भएसँगै दुवै टोलीले १/१ अंक पाएका छन् ।

हङकङमा वर्षाका कारण प्रभावित खेलमा घरेलु टोलीले टस हारेर ब्याटिङ गरेकोमा ८ ओभरमा २ विकेट गुमाएर ६५ रन बनाउँदा खेल रोकिएको थियो ।

वर्षाका कारण खेल पुनः सुरु हुन नसकेपछि नेपाल र हङकङले अंक बाडेका हुन् ।

त्यसअघि हङकङका लागि अंशुमन रथले २४ बलमा ४ चौका र १ छक्काको सहयोगमा अविजित ३६ रन बनाए । कप्तान निजाकत खानले २० बलमा २५ रन बनाए । बाबर हायात ३ रनमा अविजित रहे ।

नेपालका लागि करण केसीले ईनिङका पहिलो बलमा नै ओपनर मार्टिन कोट्जेलाई आउट गराएका थिए । अर्का ओपनर निजाकत खानलाई गुलसन झाको बलमा आउट भएका थिए । सिरिजको दोस्रो खेलमा मंगलबार नेपालले पपुवा न्युगिनीको सामना गर्ने छ ।

समूह चरणका शीर्ष दुई टोलीले फाइनल खेल्नेछन् । मार्च १३ अर्थात फागुन ३० मा सिरिजको फाइनल खेल हुनेछ । फाइनलमा स्थान बनाउँन नसकेको टोलीले तेस्रो स्थानको लागि हङकङ ए सँग खेल्नेछ । मार्च १३ अर्थात फागुन ३० मा तेस्रो स्थानको लागि खेल हुनेछ ।

नेपालले एसीसी प्रिमियर कप तथा विश्वकप तयारीका लागि सिरिजमा सहभागीता जनाउदै छ । नेपाल र पीएनजीले यस वर्ष अमेरिका र वेस्ट इण्डिजमा हुने विश्वकपमा सहभागीता जनाउदै छन् । हङकङले भने नेपालसँगै एसीसी प्रिमियर कप खेल्दैछ ।