काठमाडौं, चैत १० दुई फरक महादेशका दुई हेभिवेट टोलीहरू इंग्ल्यान्ड र ब्राजिलले शनिबार मैत्रीपूर्ण खेल खेल्दैछन् । यो हुनका लागि त मैत्रीपूर्ण खेल हो तर यसको सारगर्मी र रापताप चाहिँ भने सामान्य नहुने अनुमान धेरैको छ । किनभने, यो खेलमा युरोपको एक धारिलो र शीर्ष टिमले आफ्नो घरेलु मैदानमा दक्षिण अमेरिका महादेशको सबैभन्दा सफल र तगडा टिम ब्राजिलको सामना गर्दैछ । विश्व फुटबलको महाशक्तिराष्ट्रका रूपमा चिनिएको ब्राजिल मैत्रीपूर्ण खेलका लागि इंग्ल्यान्ड उत्रिँदा त्यहाँ घमाशान भिडन्त हेर्न पाइने पक्का छ ।

यो खेल इंग्ल्यान्डको राष्ट्रिय रंगशाला वेम्बली स्टाडियममा आयोजना हुनेछ । यो खेल हुँदा एक सारगर्मी खेलको मज्जा लिन रंगशालाभरि दर्शक भरिभराउ हुने पक्का भइसकेको छ । यो खेलमा घरेलु टोली इंग्ल्यान्ड र पाहुना टोली ब्राजिलले कस्तो टोली उतार्लान् ? सम्भावित प्लेइङ ११ यहाँ राखिएको छ । इंग्लिस टिममा डाकिएका युवा खेलाडी बुकायो शाका चोटका कारण टोली बाहिर भए बाहेक यी दुई टिममा थप नराम्रो खबर छैन । दुवै टिम यो खेलअघि राम्रो तयारीमा देखिएका छन् ।