एजेन्सी – युवा प्रतिभा एन्ड्रिकको ऐतिहासिक गोलमा ब्राजिलले अन्तर्राष्ट्रिय मैत्रीपूर्ण खेलमा इंग्ल्यान्डलाई पराजित गरेको छ । ब्राजिलले घरेलु टोली इंग्ल्यान्डमाथि १–० को जित निकालेको हो ।

वेम्वली स्टेडियम लन्डनमा शनिबार राति भएको खेलमा परिवर्तित खेलाडीको रुपमा मैदान छिरेका एन्ड्रिकले ब्राजिलका लागि पहिलो गोल गर्दै जित दिलाएका हुन् । उनले ब्राजिलका लागि तेस्रो खेलमा पहिलो अन्तर्राष्ट्रिय गोल गर्न सफल भएका हुन् ।

इंग्ल्यान्डविरुद्धको गोलसँगै एन्ड्रिक ब्राजिली क्लब र ब्राजिलबाट गोल गर्ने सबैभन्दा कान्छा खेलाडी बनेका छन् । एन्ड्रिकले १७ वर्ष २४६ दिनमा गोल गर्दै कीर्तिमान बनाएका हुन् । यसअघि रोनाल्डोले सन् १९९४ मा यो कीर्तिमान बनाएका थिए ।

प्रतिस्पर्धात्मक बनेको खेलमा घरेलु टोली इंग्ल्यान्डले बल पोसेसन राखेपनि ब्राजिली गोलरक्षक बेन्टोले सानदार प्रदर्शन गर्दा इंग्ल्यान्ड निराश बन्न पुग्यो । ब्राजिलले भने काउन्टर अट्याकमा इंग्ल्यान्डलाई दवावमा राख्दै गोल गर्न सफल भएको थियो ।

७१औं मिनेटमा रोड्रिगोको स्थानमा मैदान छिरेका एन्ड्रिकले ८०औं मिनेटमा गोल गर्दै ब्राजिललाई १–० को जित दिलाए । उनले मैदान छिरेको नवौं मिनेटमा भिनिसियस जुनियरको पासमा गोल गर्न सफल भएका थिए । एन्ड्रिकले अफसाइड बिट ट्याप गर्दै सुन्दर फिनिस गरेका थिए ।

यस जितसँगै ब्राजिलको लगातार चार जितविहीन यात्रामा पूर्णविराम लागेको छ । विश्वकप छनोटमा पेरुमाथि १–० को जित निकालेयता ब्राजिजले पछिल्लो चार खेलमा जित निकाल्न सकेको थिएन त्यसपछि ब्राजिलले भेनेजुएलासँग १–१ गोलको बराबरी खेल्दा उरुग्वेसँग २–०, कोलम्वियासँग २–१ र अर्जेन्टिनासँग १–० ले पराजित भएको थियो ।