काठमाडौं । नेपालले त्रिकोणात्मक टी–२० सिरिज (फ्रेन्डसिप कप) अन्तर्गत पहिलो खेलमा गुजरातलाई ८ विकेटले हराउँदै विजयी सुरूवात गरेको छ ।
जितकालागि ९९ रनको सामान्य लक्ष्य पछ्याएको नेपालले १५.२ ओभरमा २ विकेट गुमाउँदै पूरा गर्यो । नेपालको जितमा रोहित पौडेल २६ बलमा ३ चौकासहित ३३ र अनिल साह ३५ बलमा ३ चौका र १ छक्कासहित ३२ रनमा नट आउट रहे । कुशल भुर्तेलले १७ र आसिफ शेखले १६ रन बनाए ।
गुजरातका लागि हेमान्ग पटेल र तेजस पटेलले समान एक विकेट लिए ।त्यसअघि टस हारेर ब्याटिङको निम्तो पाएको गुजरातले १८.२ ओभरमा सबै विकेट गुमाउँदै ९८ रनको योगफल तयार पार्यो ।
गुजरातका लागि रुद्र पटेलले २३, हेमान्ग पटेलले २०, सरल प्रजापतीले १७, अभिषेक देसाइले ११ र स्मित पटेलले १० रन बनाए ।
नेपालका लागि गुल्सन झाले चार ओभरमा २२ रन खर्चिदै चार विकेट लिए । यसैगरी करण केसीले तीन र सोमपाल कामीले एक विकेट लिए । अब नेपालले दोस्रो खेलमा मंगलबार बरोडा क्रिकेट संघको सामना गर्नेछ ।
प्रतिक्रिया