काठमाडौँ। कप्तान ऋतुराज गायकवाडको अर्धशतकप्रेरित चेन्नई सुपर किंग्सले इन्डियन प्रिमियर लिग (आईपीएल)मा कोलकाता नाइट राइडर्सको अपराजित यात्रामा ब्रेक लगाइदिएको छ।

सोमबार राति सम्पन्न खेलमा चेन्नईले कोलकाताविरुद्ध ७ विकेटको जित हासिल गरेको हो। कोलकाताले सनराइजर्स हैदराबाद, रोयल च्यालेन्जर्स बेंगलुरू र दिल्ली क्यापिटललाई पराजित गर्दै सानदार लय समातेको थियो।

जितसँगै ५ खेल खेलेको चेन्नई ६ अंकसहित चौथो स्थानमा छ। पराजित कोलकाता ४ खेलबाट ६ अंक जोड्दै दोस्रो स्थानमा छ।

कोलकाताले दिएको १३८ रनको लक्ष्य पछ्याएको चेन्नईले १७.४ ओभरमा ३ विकेट गुाउँदै १४१ रन बनायो।

चेन्नईका ऋतुराजले सर्वाधिक ६७ रन बनाए। ५८ बल खेलेका उनले ९ चौका प्रहार गरे। शिवम दुबे २८, डेरिल मिचेल २५ र रचिन रविन्द्र १५ रनमा आउट हुँदा धोनी १ रनमा अविजित रहे।

कोलकाताका वैभव अरोडाले २ र सुनील नारायणले १ विकेट लिए। त्यसअघि एम ए चिन्दबरम स्टेडियममा टस हारेर पहिला ब्याटिङ थालेको  कोलकाताले निर्धाित २० ओभरमा ९ विकेट गुमाउँदै १३७ रन बनाएको थियो।

कोलकाताका कप्तान श्रेयस अय्यरले सर्वाधिक ३४ रन बनाए। सुनील नारायण २७, अंगकृष रघुवंशी २४, रमनदीप सिंह १३ र आन्द्रे रसेल १० रनमा आउट हुँदा अन्यले राम्रो प्रदर्शन गर्न सकेनन्।

चेन्नईका तुषार देशपाण्डे र रविन्द्र जडेजाले ३/३ विकेट लिएश्र मुस्तफिजुर रहमानले २ विकेट लिँदा महिश थीक्षणाको नाममा १ विकेट रह्यो।