काठमाडौँ। फुलह्याममाथि सहज जित हासिल गर्दै म्यान्चेस्टर सिटीले इङ्लिस प्रिमियर लिगको शीर्ष स्थानमा पुनरागमन गरेको छ।

क्रेभेन कुटीजमा शनिबार सम्पन्न खेलमा सिटीले घरेलु टोली फुलह्यामलाई ४–० गोल अन्तले पराजित गरेको हो। जितसँगै लिग लिडर बनेको सिटीले ३६ खेलबाट ८५ अंक जोडेको छ।

समान खेल खेलेको आर्सनल ८३ अंकसहित दोस्रो र लिभरपुल ७८ अंकसहित तेस्रो स्थानमा रहेको छ। पराजित फुलह्याम भने ३७ खेलबाट ४४ अंकसहित १३औँ स्थानमा छ।

सिटीको जितमा जोस्को ग्वार्डियोलले २ गोल गरे। यस्तै, फिल फोडेन र जुलियन अल्भारेजको नाममा १/१ गोल रह्यो।खेलको १३औँ मिनेटमा ग्वार्डियोलले गोल गर्दै सिटीलाई शुरूआती अग्रता दिलाएका थिए। उनले केभिन डी ब्रुएनाको पासमा गोल गरे।

पहिलो हाफमा १–० को अग्रता बनाएको सिटीले दोस्रो हाफमा थप २ गोल गर्‍यो। ५९औँ मिनेटमा बर्नार्डो सिल्भाको पासमा फोडेले गोल गर्दै सिटीको अग्रता दोब्बर बनाए।

७१औँ मिनेटमा ग्वार्डियोल व्यक्तिगत दोस्रो र टोलीका लागि तेस्रो गोल गरे। उनले पनि सिल्भाकै पासमा गोल गरे। दोस्रो हाफको पाँचौँ मिनेटमा फुलह्याम १० खेलाडीमा सिमित भयो।

इस्सा डिओपले डिबक्स भित्र सिटीका खेलाडीलाई फउल गरेपछि दोहोरो पहेंलो कार्ड खाँदै मैदानबाट बाहिरिए। प्राप्त पेनाल्टीमा अल्भारेजले गोल गर्दै सिटीलाई ४–० को सहज जित दिलाए।