Pura Samachar
  • स्वरोजगार बन्ने सीप, दक्षता र उद्यमशीलता आजको आवश्यकता

    प्रकाशित: ४ हप्ता पहिले

    स्वरोजगार बन्ने सीप, दक्षता र उद्यमशीलता आजको आवश्यकता

    डा.डीआर उपाध्याय–

     

    काठमाडौं, चैत ६,– देशमा बेरोजगारी समस्या दिनहुँ बढ्दै गएको छ ।

    यो चिन्ताको विषय हो ।

    दृष्टिकोण

    बेरोजगारी समस्या समयमै समाधान हुन सकेन भने देशमा असन्तुष्टिका स्वरहरु गुञ्जिन थाल्छन् । यसलाई समयमै सम्बोधन गर्ने कार्य प्रभावकारी हुन जरुरी छ ।

    यदि समयमै यो समस्या समाधान गर्न सकिएन भने यसले अझ भयावह रूप लिने निश्चित छ ।

    सरकारको नीति तथा कार्यक्रम र बजेटमा उल्लेख भए अनुसारका रोजगार सिर्जनाका कार्य योजनाको प्रभावकारी कार्यान्वयनको खाँचो छ ।

    स्थानीय, प्रदेश र संघ तीनै तहबाट रोजगार सिर्जनाको कार्यलाई प्राथमिकताका साथ अघि बढाउनु पर्छ ।

    देशमा रोजगारीको अवसर नपाएर युवा जनशक्ति खाडी मुलुक देखि अन्य मुलुकमा पलायन हुन बाध्य छन् ।

    राज्यले ती युवामा आशा, भरोसा र विश्वास जगाउन सक्नु पर्छ ।

    हाम्रो देशका युवामा केवल निराशा र वितृष्णा मात्रै छ ।

    यसो हुनुको कारण पनि छ ।

    देशमा गरि खाने शिक्षा भएन ।

    अहिलेसम्म पनि नेपालको शैक्षिक नीति सीपमूलक र व्यवहारमुखी हुन सकेको छैन ।

    जसले गर्दा शैक्षिक संस्थाहरू बेरोजगार उत्पादन गर्ने कारखानाका रुपमा परिणत भएका छन् ।

    पछिल्लो समयमा केही शैक्षिक संस्थाहरूले सीपमूलक र व्यवहारमुखी शिक्षा प्रदान गरी दक्ष जनशक्ति उत्पादन गर्ने कार्यमा लागेका छन् ।

    अब सैद्धान्तिक ज्ञान मात्रै प्रदान गरेर बेरोजगारी समस्या हल हुँदैन ।

    स्वरोजगार बन्ने सीप, दक्षता र उद्यमशीलता आजको आवश्यकता हो ।

    अब सीपमूलक र व्यावसायिक तथा प्राविधिक शिक्षामा जोड दिनु पर्छ ।

    मुलुकमा बेरोजगार समस्याले भयावह रूप लिएको छ ।

    मुलुकको कृषि, उद्योग, पूर्वाधार निर्माणलगायतका क्षेत्रमा रोजगारको अवसर सिर्जना गर्ने कार्यमा राज्यका तीन वटै तहको पहल आवश्यक देखिएको छ ।

    युवालाई स्वदेशमा टिकाउने वातावरण राज्यले सिर्जना गर्नु पर्छ ।

    युवा बिदेशिनु बाध्यता हो, रहर होइन ।

    यही बाध्यताले विदेसिएका युवाले पठाएको रेमिट्यान्समा देश चलेको छ ।

    तर पनि नेपाली जनता पीडामा छट्पटाइरहेका छन् ।

    आफ्नै देशको समृद्धिमा जुट्नुपर्ने युवा परदेशमा आँसु र पसिना बगाउँदै छन् ।

    यो दुखद कुरा हो ।

    अहिलेसम्म देशको अर्थतन्त्र रेमिट्यान्सले धानेको छ ।

    गत वर्ष विश्वव्यापी रुपमा फैलिएको कोभिड–१९ को कारण पछिल्लो समय वैदेशिक रोजगारमा कमी आएको तथ्यांकले बताएको छ ।

    कामदारको कम मागले गर्दा धेरै देशमा कार्यरत कामदार आफ्नै देश फर्कन बाध्य हुँदैछन् ।

    यसले नेपालजस्ता धेरै देश आर्थिक संकटमा पर्ने सम्भावना बढ्दै गएको छ ।

    नेपालको वैदेशिक रोजगार पनि कोभिड–१९ बाट प्रभावित छ ।

    पछिल्लो समय वैदेशिक रोजगारमा जानेको भन्दा फर्कनेको संख्या बढिरहेको छ ।

    रोजगारका लागि विदेश जानेभन्दा विदेशमा रोजगार गुमाएर फर्कनेको संख्या चार गुणा बढी रहेको देखिन्छ ।

    जसले गर्दा नेपालमा बेरोजगारको अवस्था भयावह हुने देखिन्छ ।

    देशको अर्थतन्त्रसमेत संकटमा पर्न सक्ने सम्भावना देखिएको छ ।

    जोसिला र ऊर्जाशील युवा स्वदेश फर्कनु देशका लागि अवसर पनि हो ।

    यो अवसरलाई राज्यले सहि सदुपयोग गर्न सक्यो भने देशले समृद्धिको यात्रामा फड्को मार्ने निश्चित छ ।

    प्रतिक्रिया