Pura Samachar
  • यस्तो बेलामा हाम्रा जनप्रतिनिधि कता छन् ?

    प्रकाशित: ४ हप्ता पहिले

    यस्तो बेलामा हाम्रा जनप्रतिनिधि कता छन् ?

    –डा.डीआर उपाध्याय

    काठमाडौं, जेष्ठ ५ ।

    देशमा पटक–पटक राजनीतिक परिवर्तन भए र व्यवस्था पनि बदलिए ।

    तर, दु:खको कुरा जनताको अवस्थामा कुनै परिवर्तन आउन सकेन ।

    पछिल्लो राजनीतिक परिवर्तनपछि आएको यो व्यवस्थामा जनताको अवस्थामा केही परिवर्तन आउँछ की भन्ने आम जनतामा झीनो अपेक्षा थियो ।

    तर, जनताका ती अपेक्षाहरु अझै पुरा हुन सकेका छैनन् ।

    आज देशमा जुन व्यवस्था छ, यो व्यवस्थामा जनताको भाग्य र भविष्य सुन्दर हुनु पर्दथ्यो ।

    तर यहाँ नेता र जनप्रतिनिधिहरुको मात्र भाग्य र भविष्य सुन्दर छ, अरुको छैन ।

    अहिले देशमा जुन किसिमका राजनीतिक गतिविधिहरु भइरहेका छन्, त्यसले वास्तवमा नेपालीको भविष्य बन्ने देखिँदैन ।

    मुलुकको विकास अनि समृद्धिको यात्रामा लम्कने त्यो सपना केवल भ्रम मात्र भइरहेको छ ।

    व्यवस्था परिवर्तन हुँदा जनताको भाग्य र भविष्य किन निर्माण हुन सकेन ?

    आज उठ्ने प्रश्न भनेको यो हो ।

    व्यवस्था अनि व्यवस्थासँगै परिवर्तित भएका पात्र, जनप्रतिनिधिहरु नै इमान्दार भएनन् ।

    समस्या यहाँनिर छ ।

    जनतालाई भ्रम बाँडेर भोट बटुल्ने र जनताको आडमा चुनाव जित्ने, चुनाव जितिसकेपछि जनतालाई वास्ता नगर्ने ?

    यो कस्तो राजनीति हो ?

    जनताको जनमतको प्रतिनिधित्व गर्ने भएरै जनप्रतिनिधि भनिएको हो ।

    जनप्रतिनिधिको काम,कर्तव्य भनेकै जनताको सेवा गर्नु हो ।

    जनताको आवाज बुलन्द गर्नु हो ।

    विकास निर्माणका काममा अग्रणी भूमिका निर्वाह गर्नु हो ।

    तर, बिडम्बना जनताको अपेक्षा बमोजिम काम हुन सकेनन् ।

    यिनै जनप्रतिनिधिबाट सञ्चालित सरकारलाई जनताको आफ्नै शासन पनि भन्ने गरिन्छ ।

    यी जनप्रतिनिधिहरुले जनताको सुख–दुःखमा महत्वपूर्ण भूमिका खेल्नु पर्छ ।

    तर विडम्बना, खै जनताको सुख–दुःखमा महत्वपूर्ण भूमिका खेलेको ?

    एकपटक होइन पटक–पटक यिनै जनप्रतिनिधिमाथि कैयौं भ्रष्टाचारका आरोप लागिराखेका समाचार आउँछन् ।

    आरोपित कतिपयका भ्रष्टाचार प्रमाणित भएर सजायसम्म काटिरहेका छन् भने कतिपयका मुद्दा न्यायालयमा विचाराधीनको अवस्थामा छन् ।

    हिजो हामी जस्तै गरिव भएका देशहरु आज विकास र सम्पन्नताको हिसावले कहाँदेखि कहाँ पुगि सके ।

    हामी भने हिजो जस्तो अवस्थामा थियौं, आज पनि त्यही अवस्थामा छौं ।

    हामी कहिले अघि बढ्ने ?

    ती राष्ट्रबाट हामीले कहिले पाठ सिक्ने ?

    जुन देशमा जनप्रतिनिधिहरु अनुशासित हुन्छन्, ती देशहरुले छिटो विकासको फड्को मारेका छन् ।

    उनीहरु भष्टाचार गर्दैनन्, अनुशासनमा बस्छन् ।

    त्यसो भएर नै उनीहरुको देश सम्पन्न भएको हो ।

    वास्तवमा राष्ट्रलाई सामाजिक, आर्थिक र राजनीतिक रूपमा माथि उठाउने भनेको जनप्रतिनिधिहरुले नै हो ।

    यसमा उनीहरुको प्रमुख भूमिका रहेको हुन्छ ।

    खराब र भ्रष्ट जनप्रतिनिधिका कारण देश माथि उठ्न सकेन ।

    देश पछाडि पर्नुको मुख्य कारण भनेको भ्रष्टाचार र कुशासन नै हो ।

    जनप्रतिनिधिका नाममा घुस खानु, कमिसनको बार्गेनिङ गर्नु भनेको जनताको अपमान हो ।

    कयौं जनप्रतिनिधिहरु ठेक्कापट्टाका मालिक भएका छन्, अनि कसरी हुन्छ देशको विकास ?

    यिनले शासनसत्ताको चरम दुरुपयोग गरिरहेका छन् ।

    आफ्नो व्यक्तिगत विकास गरिरहेका छन् ।

    नेपाली जनता भने अभावमा बाँच्न बाध्य छन् ।

    मुलुकमा जे भइरहेको छ, ठिक भइरहेको छैन ।

    अब सुधारको आवश्यकता छ ।

    आज देश कोरोना भाइरसको संक्रमणले आक्रान्त छ ।

    दिनहुँ दिन सयौंका संख्यामा मानिसले उपचार नपाएर ज्यान गुमाउनु परिरहेको छ ।

    हजारौंको संख्यामा संक्रमण बढिरहेको छ ।

    हजारौंले हस्पिटलमा बेड नपाएर बिरामीलाई एम्बुलेन्समा राखी काठमाडौंको निजीदेखि सरकारी अस्पतालको गेटगेटमा पुगी बिन्ती चढाइरहेका छन् ।

    उता अक्सिजन नपाएर कैयौं बिरामीको ज्यान गएको छ ।

    लकडाउनका कारण गरीव र निमुखा जनताको खाना नपाएर बिजोग छ ।

    यस्तो बेलामा हाम्रा जनप्रतिनिधि कता छन् ?

    कोभिड–१९ बाट बच्न हिजोका दिनमा गरिएका पूर्वतयारीका विधि यो दोस्रो चरणमा झन् तीव्र रूपमा अगाडि बढाउनु पर्ने हो ।

    हिजोका कमी–कमजोरीबाट पाठ सिक्दै झन् प्रभावकारी तवरले अगाडि बढनु पर्ने होइन र ?

    खै, त्यो त देखिएन ।

    आफ्नै जनप्रतिनिधिबाट आयात गरिएका औषधिजन्य वस्तुमा चरम घोटाला भएका समाचार आउँछन् ।

    यस्तो अवस्थामा जनप्रतिनिधिबाट हामी अरु के आशा गर्न सक्छौं ?

    आज भ्रष्टाचार र अक्षमताले विकराल स्थिति ल्याएको छ ।

    राज्यस्तरबाट व्यवस्थापनमा कौशल नहुनु यसको प्रमुख कारण हो ।

    हाम्रा स्थानीयस्तरका प्रमुखले एउटा बेडसम्म उपलब्ध गराउन नसकेका समाचार आउँछन् ।

    जनता अप्ठ्यारोमा परेका बेलामा हो सहयोग गर्ने भनेको ।

    अरु बेला त आफैं गरि खान्छन् ।

    प्रतिक्रिया