–डा.डिआर उपाध्याय
काठमाडौं, १८ जेष्ठ ।
नेपालमा पछिल्लो साता राजनीतिक सरगर्मी निकै बढेको छ ।
दलीय स्वार्थपूर्ण राजनीति र भागवण्डाका कारण सत्ताधारी गठबन्धनमा आएको विवाद उत्कर्षमा पुगेको छ ।
यतिबेला आम नागरिक कोरोना महामारीको संक्रमणको जोखिमबाट गुज्रिरहेका छन् ।
यस्तो बेलामा राजनीति गर्नु पटक्कै सुहाउने कुरा होइन ।
जनता रोएको बेला सत्ता स्वार्थको यो फोहोरि खेल बन्द हुनु पर्दथ्यो ।
अहिलेको यो बेला भनेको सबै मिलेर कोरोना बिरुद्ध लड्ने हो ।
सारा मान्छेको ध्यान कोरोना माहामारीतर्फ गइरहेका बेला दल र तिनका नेताहरुको ध्यान सत्तामा गएको देख्दा लाज लागेर आउँछ ।
जन प्रतिनिधिमूलक संसद विघटन र महामारीका समयमा स्वास्थ्योपचारलाई पन्छाउँदै निर्वाचनको घोषणा गर्नुले आम जनतामा नैराश्यता फैलिएको छ ।
यता बिपक्षी दलहरु यो बिषयलाई लिएर आक्रोशपूर्ण अभिब्यक्ति दिईरहेका छन् ।
व्यक्तिगत स्वार्थदेखि दलीय विवाद हुँदै दोस्रोपटक पनि पुनः प्रतिनिधिसभा विघटन भयो ।
यसले जनतामा राम्रो संकेत दिइरहेको छैन ।
राजनीतिक संकट, स्वास्थ्य संकट, आर्थिक संकट साथै मानवीय संकटका बीच फेरि चुनावको घोषणा गर्नुले दुनियाँलाई के सन्देश जान्छ ?
वर्तमान समयमा महामारी नियन्त्रणका लागि संयन्त्र, सामग्री र बजेट कै अपुग छ ।
अन्तर्राष्ट्रिय निकायसँग महामारी नियन्त्रणका लागि अक्सिजन सिलिन्डर, स्वास्थ्य सामग्री, औषधि लगायतका सहयोगको हारगुहार गर्नु परेको छ ।
यस्तो बेलामा संसद बिघटन गरी चुनाव घोषणा गर्नु कुनै अर्थमा राम्रो मानिँदैन ।
संसद बिघटन र चुनाव अवैधानिक, असंवैधानिक कदम हुन् ।
संसद छिटो पुनःस्थापना हुनु पर्छ ।
यस्तो अवस्थामा अध्यादेशबाट बजेट ल्याइएको छ ।
बजेट कार्यान्वयन हुन धेरै जटिल छ ।
आज सबै कुरा छाडेर सत्ता समीकरणको सौदाबाजी हुँदैछ ।
सत्ता(स्वार्थ केन्द्रित यो खेलले समग्र व्यवस्था माथि नै खतरा उत्पन्न गरिरहेको छ ।
व्यक्तिगत, दलीय गुटगत स्वार्थ, आरोप प्रत्यारोप, विवाद र सत्ता समीकरणमा देखिएका कमीकमजोरीले व्यवस्थामाथि नै प्रहार हुने संकेत देखिएको छ ।
आज फेरि विधि र व्यवस्था जोगाउन प्रतिनिधिसभाका सांसदहरू अदालतको ढोकामा पुग्नु परेको छ ।
सरकारका एकलौटी निर्णय र संवैधानिक निकायहरूमा गरिएको भागवण्डा, सम्मानित संस्थामाथिको हस्तक्षेप र विवादले राज्यका संयन्त्रहरू कमजोर भएका छन् भने नागरिकमा चरम वितृष्णा र आक्रोस छाएको छ ।
कोरोना र राजनीतक संक्रमणको यो महाव्याधिमा सरकार जनता जोगाउने प्रयत्नमा लागेन ।
विगतमा देखिएका कमीकमजोरीलाई सच्याउँदै जाने बेलामा फेरी दल र तिनका नेताहरु गल्ति दोहोराउँदै छन् ।
नेपाली जनताले कानूनी र विधिको शासन कायम गर्न, गराउन नयाँ संविधानको परिकल्पना, निर्माण र कार्यान्वयनमा साथ दिएका हुन् ।
दल र तिनका नेताहरुले जनतामाथि खेलवाड गर्ने काम गरिरहेका छन् ।
दुई तिहाईको सरकार बचाउन नसक्ने ओलीले फेरि किन चुनावको नाटक गर्दैछन् ?
यिनलाई किन चुनाव चाहिएको हो ?
त्यति ठूलो कम्युनिष्टको सरकार र त्यो अवसरलाई सदुपयोग गर्न नसक्ने ओलीले अब चुनाव गरेर के गर्लान ?
दुनियाँ एकातिर छ उनी चुनावको नौटंकी गर्दैछन् ।
प्रतिक्रिया