लुम्बिनी सरकारले आज प्रदेश सभामार्फत आगामी वर्षको नीति तथा कार्यक्रम प्रदेश प्रमुख धर्मनाथ यादवमार्फत सार्वजनिक गर्ने कार्यक्रमको विपक्षी गठबन्धनका सांसदहरुले विरोध गरेका छन् ।

दिउँसो साढे ४ बजे सुरु भएको बैठकमा विपक्षी दलका प्रमुख सचेतक मात्र उपस्थिति भएका छन् । प्रमुख सचेतक बाहेक गठबन्धनमा अबद्ध ४ दलका अरु प्रदेशसभा सदस्यहरुले बैठक बहिस्कार गरेका छन् ।

गठबन्धन दलहरुको जेठ १९ गते प्रदेश प्रमुख यादवले संविधान विपरित एक दलको जस्तै गरी काम गरेकाले आज प्रदेश सभा बैठक वहिस्कार गर्नु परेको नेपाली काँग्रेस सचेतक निर्मला क्षेत्रीले बताइन् । उनले भनिन्, ‘हामीले प्रदेश प्रमुखको विरोध गरेका हौं, निति तथा कार्यक्रम बजेट बिषय छुट्टै धारणा आउँछ ।

यसअघि सोमबार बसेको मन्त्रिपरिषद्को बैठकले सरकारको नीति तथा कार्यक्रम स्वीकृत गर्दै प्रदेश प्रमुख धर्मनाथ यादवलाई प्रदेश सभामा प्रस्तुत गर्न आग्रह गर्ने निर्णय गरेको थियो । गठबन्धनका सांसदको विरोधका बीच प्रदेश प्रमुखले नीति तथा कार्यक्रम बाचन गरिरहेका छन् ।

यस्तै विश्वासको मत नलिएको सरकारको वैधानिकतामा समेत प्रश्न रहेको गठबन्धनको भनाइ छ ।