बिहीवार राष्ट्रिय सभाको आठौं अधिवेशनको पहिलो बैठकमा बोल्दै राष्ट्रिय सभा सदस्य प्याकुरेलले शक्ति पृथकिकरणको सिद्धान्तलाई नबुझेर राजनीतिक विवादलाई अदालतमा लगिएको भन्दै राजनीतिक विवादलाई राजनीतिक रुपमै समाधान गर्नुपर्ने बताएका हुन् । राजनीतिक समस्याको समाधानको थलो न्यायपालिका नहुने उनले बताए । उनले भने– ‘राजनीतिक विवादको अन्त्य राजनीतिक रुपमै गर्नु जरुरी छ । शक्ति पृथकीकरणको सिद्धान्त नबुझेर न्यायपालिकामा लगेको । न्यायपालिकामा हानी गर्न लागेको त्यसप्रति सचेत हुन जरुरी छ । राजनीतिक विवादको अन्त्य राजनीतिक रुपमै गर्नु आवश्यक छ । राजनीतिक विवादको अन्त्य हामीले अन्तबाट खोज्यौँ । कार्यपालिका, व्यवस्थापिका र न्यायपालिकाको अलग अलग जुन शक्ति पृथकिकरणको सिद्धान्तलाई नबुझीकन हरेक कुरोलाई न्यापालिकामा जसरी हामी लगिरहेका छौँ र न्यायापालिकालाई हानी गर्न जुन प्रयत्न भइरहेको छ । त्यसबाट सचेत हुन आवश्यक छ । प्रत्येक राजनीतिक समस्याको थलो न्यायपालिका हुन सक्दैन ।’

उहाँले विपक्षी राजनीतिक दलहरुले संविधानको मर्म विपरित निर्दलीयताको वकालत गरेको भन्दै दुख व्यक्त गरे । उनले भने– ‘आफ्नो जन्मदेखि नै बहुदलीय प्रणालीको लागि प्रतिवद्ध भनिएका कतिपय राजनीतिक शक्तिहरु अहिले जसरी संविधानको मुल मर्म विपरित निर्दलीयताको वकालत गरिरहनुभएको छ । त्यो दुखद छ । त्यसप्रति सबैलाई सचेत र सजग हुन अनुरोध गर्न चाहान्छु ।

प्याकुरेलले वाम र प्रजातान्त्रिक शक्तिहरुको सहकार्यले मात्रै आजसम्मको राजनीतिक परिवर्तन सम्भव भएको भन्दै सबै राजनीतिक दलहरु एकताबद्ध हुनुपर्नेमा जोड दिनुभयो । उनले भने– ‘नेपालको निरंकुश राजतन्त्रको अन्त्यको लडाँइ होस् या कुनैपनि लोकतान्त्रिक आन्दोलन होस्, त्यसमा वाम र प्रजातान्त्रिक शक्तिहरुको सहकार्यले मात्रै सम्भव भएको इतिहासलाई एकचोटी सबैले स्मरण गर्नुपर्ने अनुरोध गर्न चाहान्छु । वाम प्रजातान्त्रिक शक्तिहरुको एकता र सहकार्यमा विभाजन आउनासाथ उपलब्धीहरु गुमेको हाम्रो इतिहास साक्षि छ । त्यसप्रति सबैलाई मनन गर्न अनुरोध गर्न चाहान्छु ।’

राजनीतिक समस्या समाधानका निम्ति सबै राजनीतिक शक्तिहरु सहमतीका साथ अघि बढ्न उनले अनुरोध गरे ।