काठमाडौं – अमेरिकाका चर्चित व्यक्तिहरू एवं कम्पनीका ट्वीटर एकाउन्ट ह्याक भएका छन्।
एउटा ठूलो सङ्गठित साइबर हमलालाबाट पूर्वअमेरिकी राष्ट्रपति बराक ओबामा, राष्ट्रपतिका लागि डेमोक्र्याटिक उमेद्दवार जो बाइडन, अर्बपतिहरू जेफ बेजोस, एलन मस्क, बिल गेट्स, माइकल ब्लुमवर्ग, र्यापर कानिय वेस्ट लगायतका ट्वीटर ह्याक गरिएको छ ।
उबर र एपलजस्ता संस्थाहरूसमेत हमलामा परेको बीबीसीले जनाएको छ । ह्याक भएका यी ट्वीटर प्रयोगकर्ताका दशौँ लाख फलोअर्स थिए ।
ओबामा, बाइडन र वेस्टका खातामा झुटा ट्वीटहरू राख्दै मानिसहरूलाई एक हजार डलरको क्रिप्टोकरेन्सी चन्दास्वरूप पठाउन भनिएको थियो।
टेस्ला र स्पेश एक्स कम्पनीका प्रमुख एलन मस्कको आधिकारिक ट्वीटरमा ‘आउँदा केही घन्टामा’ दिइएको डिजिटल वालेटको ठेगानामा पठाइने जति पनि बिटक्वाइनको भुक्तानी दोबर हुने लेखिएको थियो।
ती ट्वीटहरू पोष्ट भएको केहीबेरमा हटाइएका थिए। ह्याक भएका ती एकाउन्टमा थप ट्वीट गर्नबाट रोकिएको छ।
ट्वीटरमा अहिलेसम्मकै ठूलो हमला ठानिएको यस घटनापछि कम्पनीले अनुसन्धान गरिरहेको जनाएको छ।
प्रतिक्रिया