एजेन्सी । इटालियन सिरी ए क्लब इन्टर मिलान साख्तर डोनेक्समाथि फराकिलो जित निकाल्दै युरोपा लिगको फाइनलमा प्रवेश गरेको छ । सोमबार राति भएको खेलमा साख्तरमाथि ५-० गोलको फराकिलो जित निकाल्दै मिलान फाइनलमा प्रवेश गरेको हो ।

मिलानको जितमा फरवार्डद्धय लोउटारो मार्टिनेज र रोमेलु लुकाकुले समान दुई दुई गोल गरे भने ड्यानिलो डि एम्ब्रुसियोले एक गोल गतेका थिए ।

खेलको १९औं मिनेटमा अर्जेन्टिनी फरवार्ड मार्टिनेजले गोल गर्दै मिलानलाई अग्रता दिलाए । उनले निकोलो बरेल्लाको क्रसमा हेडरमार्फत गोल गर्दै पहिलो हाफमा मिलानलाई १-० गोलको अग्रता दिलाएका हुन् । ६४ औं मिनेटमा मार्सेलो ब्रोजोभिकको कर्नर प्रहारमा एम्ब्रुसियोले गोल गरेका हुन् ।

७४औं मिनेटमा लुकाकुको पासमा मार्टिनेजले व्यक्तिगत दोस्रो गोल गर्दै मिलानलाई ३-० को अग्रता दिलाए । ७८औं मिनेटमा मार्टिनेजको पासमा लुकाकुले गोल गर्दै इन्टरलाई ४-० ले अघि बढाए । ८३औं मिनेटमा लुकाकुले स्टेफनको पासमा व्यक्तिगत दोस्रो गोल गर्दै इन्टरलाई ५-० गोलको फराकिलो जित दिलाएका हुन् ।

अब उपाधिका लागि फाइनलमा मिलानले स्पेनिस क्लब सेभिल्लाको सामना गर्ने छ । सेभिल्ला आइतबार राति भएको खेलमा प्रीमियर लिग क्लब म्यान्चेस्टर युनाइटेडलाई पराजित गर्दै फाइनलमा स्थान बनाइसकेको छ ।