Pura Samachar
  • ओसाकाले दोस्रो पटक जितिन् युएस ओपन उपाधि

    प्रकाशित: २ हप्ता पहिले

    ओसाकाले दोस्रो पटक जितिन् युएस ओपन उपाधि

    २८ भदौ, काठमाडौं । जापानी खेलाडी नाओमी ओसाकाले दोस्रो पटक युएस ओपन ग्राण्डसलाम टेनिसको उपाधि जितेकी छन् ।

    न्यूयोर्कमा भएको महिलातर्फको फाइनलमा बेलारुसकी भिक्टोरिया अजारेन्कालाई २-१ सेटमा पराजित गर्दै ओसाकाले दोस्रो पटक उपाधि जितेकी हुन् ।

    पहिलो सेट ६-१ ले गुमाएपनि ओसाकाले त्यसपछि पुनरागमन गर्दै लगातार दुई सेट जितिन् । उनले ६-३ , ६-३ ले बाँकी सेट आफ्नो पक्षमा पार्दै ट्रफी उचालेकी हुन् ।

    सन् २०१३ पछि पहिलो पटक ग्राण्ड्सलामा फाइनल पुगेकी अजारेन्काले उपविजेतामै चित्त बुझाइन् ।

    ओसाकाले यसअघि सन् २०१८ मा पनि युएस ओपन जितेकी थिइन् । यस्तै उनले २०१९ मा अष्ट्रेलियन ओपनको उपाधि समेत जितेकी थिइन् । ओसाकाले फाइनल पुगेको तीनवटै अवसरमा उपाधि जितेकी हुन् ।

    ‘म तपाईसँग अब अरु फाइनल खेल्न चाहन्छु । मैले साँच्चै यसमा इन्जोए गरिनँ । यो मेरो लागि साँच्चै कठिन म्याच थियो,’ ओसाकाले अजारेन्कालाई ठट्टा गर्दै भनिन्, ‘यो मेरो लागि साँच्चै प्रेरणादायी रह्यो किनकी म सानो हुँदा तपाईको खेल हेर्ने गर्थें । मैले धेरै सिकेँ, त्यसैले धन्यवाद ।’

    पुरुषतर्फको उपाधिका लागि डोमिनिक थिएम र एलेक्जान्डर जेभरेभबीच प्रतिस्पर्धा हुनेछ ।

    प्रतिक्रिया