Pura Samachar
  • १० खेलाडीमा सीमित युभेन्ट्स नवप्रवेशी टिमसँग बराबरीमा रोकियो

    प्रकाशित: १ महिना पहिले

    १० खेलाडीमा सीमित युभेन्ट्स नवप्रवेशी टिमसँग बराबरीमा रोकियो

    इटालियन सिरि एमा साविक विजेता युभेन्ट्स बराबरीमा रोकिएको छ। शनिबार राति भएको प्रतिस्पर्धामा युभेन्ट्सलाई  नवप्रवेशी टिम क्रोटोनेले १-१ गोलको बराबरीमा रोकेको हो।

    खेलमा अग्रता क्रोटोनेले खेलको १२ मिनेटमा लियो। उसका लागि सिमीले पेनाल्टीमा गोल गरेका थिए।

    २१ मिनेटमा युभेन्ट्सले बराबरी गोल फर्काउन सफल भयो। युभेन्ट्सका लागि अल्भारो मोराटाले डेब्यू खेलाडी फेडेरिको केयसाको पासमा गोल गरेका थिए।

    ६० मिनेटमा उनै केयसाले रातो कार्ड पाउँदा युभेन्ट्स १० खेलाडीमा सीमित बन्यो। उनले लुका किगारिनीलाई फउल गरेपछि रेफ्रीले सिधा रातो कार्ड देखाएका थिए।

    खेलमा स्ट्राइकर क्रिस्टियानो रोनाल्डो अनुपस्थित थिए। गत मंगलबार कोरोना भाइरसको संक्रमण भएपछि रोनाल्डो आइसोलेसनमा छन्।

     

    यता मिलान डर्बीमा एसी मिलानले इन्टर मिलानलाई २-१ ले हराएको छ। नापोलीले एटलान्टामाथि ४-१ को जित हात पार्दा साम्पडोरियाले लाजियोलाई ३-० गोलले पराजित गरेको छ।

    अंक तालिकामा एसी मिलान ४ खेलबाट १२ अंकसहित शीर्ष स्थानमा छ।

    दोस्रो स्थानका एटलान्टाको ९ अंक छ भने नापोली ८ अंकसहित तेस्रो स्थानमा छ। गोल अन्तरमा पछि परेको साविक विजेता युभेन्ट्स पनि ८ अंकसहित चौथो स्थानमा छ।

    प्रतिक्रिया